*گیس صارفین کے لیے بری خبر، چوری کے نام پر 11 ارب روپے سے زائد بل بھیج دیے گئے*
کراچی: ایس ایس جی سی انتظامیہ نے گیس خسارے پر صارفین سے اربوں کی وصولی کر لی۔
تفصیلات کے مطابق خسارہ اور گیس کی چوری کے نام پر سوئی سدرن گیس کمپنی نے صارفین کو 11 ارب روپے سے زائد بل بھیج دیے ہیں۔
ذرائع کا کہنا ہے کہ 11 ارب روپے کے بل کی گیس کا مجموعی والیوم 23 بلین کیوبک فٹ گیس کا استعمال ہے، اضافی بل بھیجنے سے کمپنی کا یو ایف جی 18 فی صد سے کم کر کے 10 فی صد دکھایا گیا۔
ذرائع کے مطابق کم یو ایف جی ظاہر کر کے خسارے میں جانے والی کمپنی کو منافع میں تبدیل کرنا ہے۔
جولائی 2023 سے مئی 2024 تک صارفین کو اضافی 11 ارب سے زائد بل بھیجے گئے ہیں، چوری، سلو میٹر اور پی یو ایف جی کے نام پر صارفین پر اربوں روپے کا بوجھ ڈالا گیا ہے۔
واضح رہے کہ ایس ایس جی سی کے مجموعی صارفین کی تعداد 35 لاکھ سے زائد ہے، جن کو جولائی 2023 سے مئی 2024 تک ایک سال میں 79 ارب روپے کے بل بھیجے گئے، پچھلے سال کے مقابلے میں 44 ارب روپے زیادہ رقم کے بل صارفین کو بھیجے گئے ہیں۔
