مایا تہذیب (Maya civilization) ایک قدیم میسوامریکی تہذیب ہے جو شمال وسطی امریکہ میں پھیلی ہوئی تھی۔ اس علاقے میں آجکل میکسیکو، ہونڈوراس، بیلیز اور گوئٹے مالا کی ریاستیں موجود ہیں۔مایائی تہذیب کو ترقی یافتہ دور و تہذیب کا درجہ دیا جاتا ہے۔۔مایائی تہذیب کا راج1300قبل از مسیح سے300 تک کے درمیانی عرصہ میں تھا۔مایائی لوگ و تہذیب پانچ لاکھ مربع کلومیٹر پر پھیلے ہوئے تھے۔یہ توہم پرست لوگ تھے کیونکہ وہ سورج ،زمین ،بارش ،اگ و پانی کو دیوتا کا درجہ دیتے تھے۔ یہ مایائی مفکرین تھے جنہوں نے سال کو کچھ دنوں کے فرق سے365 دنوں میں تقسیم کیا تھا۔یوں یہ اندازہ کیا جاسکتا ہے کہ ان لوگوں کا فلکیاتی علم اور تخیل کتنا نفیس بابصیرت اور وسیع الخیال تھا۔وہ سورج چاند کی گردش پر سیر حاصل معلومات رکھتے تھے۔مایائی تہذیب کے وارث آج بھی جزیرہ نمائے یوکاٹن پر موجود ہیں۔
اس دوران انہوں نے بڑے علاقوں میں شہری تعمیرات کی۔ اسی دور میں انہوں نے یادگاری تحریریں چھوڑیں اور اسی دور میں انہوں نے اپنی تہذیب اور تمدن کو باقاعدہ ریکارڈ کیا۔ مایا تہذیب میسو امیریکن کی دیگر اقوام سے یوں ممتاز تھی کہ انہوں نے بہت پہلے لکھنا سیکھ لیا تھا۔ ان کا اپنا طرز تحریر تھا۔ اس کے علاوہ ریاضی میں بھی ان کی ترقی حیرت انگیز تھی نہ صرف یہ کہ انہوں نے نمبروں کو لکھنا سیکھ لیا تھا بلکہ یہ صفر کے استعمال سے بھی واقف تھے۔
فلکیات، طبیعیات، جراحت اور ذراعت میں ان کی ترقی حیران کن تھی۔ ان کی تہذیبی اور ثقافتی برتری نے اردگرد کی دیگراقوام کو بھی متاثر کیا، یہ سلسلہ یونہی چلتا رہا حتی کہ ہسپانوی نوآبادکار ان علاقوں میں پہنچی اور مایا تہذیب کو بزور طاقت زوال پذیر ہونے پر مجبور کیا گیا۔ مایا اقوام کے صحائف ڈھونڈ ڈھونڈ کر جلائے گئے، ان کی تعمیرات کو نقصان پہنچایا گیا اور ان کی زبان اور مذہبی رسومات کو شیطانی قرار دے دیا گیا۔
مایا تہذیب زوال پذیر ہوئی مگر مایا قوم کی اولادیں آج بھی میسو امریکن علاقوں میں موجود ہیں۔ ان میں سے بہت سارے لوگ ابھی بھی مایا مذہب کی بہت سی رسومات پر عمل کرتے ہیں مگر مایا کے پیچیدہ رسم الخط کو وہ بھول چکے ہیں۔
