لندن (نیوز وی او سی آن لائن )پاکستانی نژاد برطانوی باکسر عامر خان کی اہلیہ فریال مخدوم کو مشہور برطانوی رئیلٹی شو’’بگ برادر‘‘ میں شرکت کی پیش کش ہوئی ہے جس میں شرکت کرنے یا نہ کرنے کا فیصلہ انہوں نے مداحوں پر چھوڑ دیا ہے۔
گزشتہ دنوں باکسر عامر خان کی اہلیہ فریال مخدوم نے اپنے سسرالیوں پر شوہر کی غیر موجودگی میں تشدد کے الزامات لگائے تھے جس کے بعد ایک نہ ختم ہونے والا تنازعہ شروع ہوگیا تھا جب کہ دونوں جانب سے ایک دوسرے پر سنگین الزامات عائد کرنے کا سلسلہ اب بھی جاری ہے لیکن اب اس ساری صورتحال سے جلد ہی پردہ کشائی ہونے والی ہے۔
برطانیہ کے مشہور رئیلٹی شو’’بگ برادر‘‘ کے منتظمین نے باکسر عامر خان کی اہلیہ فریال کو شو میں شرکت کی پیش کش کردی ہے جس میں شرکت کا تاحال کوئی فیصلہ نہیں کیا گیا لیکن فریال نے اپنے مداحوں سے شو میں شریک ہونے سے متعلق رائے مانگی ہے۔ فریال مخدوم کا سوشل میڈیا پرپوسٹ شیئر کرتے ہوئے کہنا تھا کہ بگ برادر منتظمین نے انہیں شو کا حصہ بنانے کی خواہش کا اظہار کیا ہے جب کہ انہوں نے اپنے مداحوں سے مشورہ کیا کہ آیا انہیں شو کا حصہ بننا چاہیئے یا نہیں۔
