اسلام آباد (نیوز وی او سی آن لائن) عبدالرشید غازی قتل کیس میں اہم پیش رفت، پرویزمشرف نے کیس کا سامنا کرنے کا فیصلہ کر لیا ،کیس کی تیاری کرنے کے ساتھ عدالت میں پیش ہونے کے لیے سیکورٹی بھی مانگ لی۔ تفصیلات کے مطابق ایڈیشنل ڈسٹرکٹ اینڈ سیشن جج پرویز القادر میمن نے پرویز مشرف کے ریڈ روانٹ جاری کر کے انٹرپول کے ذریعے پاکستان لانے کی درخواست پرسماعت کی۔ پرویز مشرف کے وکیل ملک طاہر کی جگہ نئے وکلاءاختر شاہ اور عبدالوحید صدیقی پیش ہوئے اور عبدالوحید صدیقی نے اپنا وکالت نامہ بھی جمع کرایا۔ سابق صدر کے وکلاءنے سماعت کے دوران فاضل جج سے استدعا کی کہ سابق صدر کے خلاف دائر کی گئی درخواست پر دلائل دینے کے لیے وقت دیا جائے۔ فاضل جج نے ریمارکس دیتے ہوئے کہاکہ ڈی ایچ اے میں مشرف کا پلاٹ ہولڈ کر دیا گیا ہے جبکہ آئندہ سماعت پر ان کے ریڈ وارنٹ جاری کرنے یا نہ کرنے پردلائل ہوں گے اور پرویز مشرف کی طرف سے آنے والی درخواست کوبھی دیکھیں گے ۔ فاضل جج نے ان ریمارکس کے بعد کیس کی سماعت 8فروری تک ملتوی کر دی ۔
