لاہور( کلچرل رپورٹر) اداکارمعمررانانے کہاہے کہ پاکستا ن فلم انڈسٹری اپنے عروج کی طرف گامزن ہے ۔ سایہ خدائے ذوالجلال حب الوطنی پر مبنی شاندار فلم ہے جو توقعات پر پورا اُتریگی ۔ان خیالات کااظہارانہوں نے گزشتہ روزپریس کانفرنس کرتے ہوئے کیا انکے ہمراہ فلم کے پروڈیوسر ڈاکٹر توصیف رزاق،ہدایتکار عمیر فاضلی اورسینئر اداکار نیئراعجازبھی موجودتھے ۔انکا کہنا تھا موضوعاتی فلموں کے ذریعے ہم نوجوان نسل کو حب الوطنی کا درس دے رہے ہیں ، ڈاکٹر توصیف رزاق کاکہناتھا جدیداورمعیاری پاکستانی فلمیں آنے سے سینما گھرو ں کی رونقیں بحال ہو گئی ہیں۔میری فلم سایہ خدائے ذوالجلال عام موضوعات سے ہٹ کرہے ۔انہوں نے کہا عوام جلسوں اور تحریکوں کیلئے تو باہر نکل آتے ہیں انہیں چاہیے کہ حب الوطنی پربننے والی فلمیں دیکھنے کیلئے بھی نکلیں۔فلم بنانے میں آئی ایس پی آر کا تعاون شامل ہے جن پرمیں انکا بے حد مشکور ہوں۔
