کراچی(سٹاف رپورٹر)ورسٹائل اداکارہ حنا دلپذیرنے کہا ہے کہ ٹی وی فنکاروں نے ڈرامہ کے بعد فلم انڈسٹری میں بھی اپنے قدم جمالیے ہیں کئی فلموں میں کا م کی آفرزملتی رہیں لیکن پہلی فلم جیون ہاتھی کی نمائش کا انتظارکررہی تھی ، اب مزیدفلموں میں کام کرنے کاارادہ ہے ۔ فلم کا جاندار سکرپٹ ،عمدہ کہانی اور کردار میری ترجیحات ہونگی۔ اس فلم میں فصیح باری خان کے سکرپٹ کی بنا پر کام کیاہے ۔ ان خیالات کا اظہار انہوں نے گزشتہ شب نمائندہ دنیاسے کیا ، انکا کہناتھا موجودہ دور میں شائقین کی ترجیح تفریح سے بھرپور فلمیں ہیں ، ٹینشن زدہ ماحول میں مسکراہٹوں کی تلاش میں لوگ سرکردہ ہیں میری بھی کوشش ہوتی ہے کہ اپنی پرفارمنس سے ادا س ہونٹو ں پر مسکراہٹیں بکھیرسکوں۔ٹی وی ڈراموں میں کسی حدتک کامیاب رہی ہوں اب میرا مشن فلم بینوں کو اپنی پرفارمنس سے خوش کرناہے ، اچھی فلمیں ہی ملکی انڈسٹری کوسہارا دینے کاسبب بن سکتی ہیں۔ امسال بھارتی فلموں کے مقابلے میں ملکی فلموں نے ریکارڈبزنس کرکے نہ صرف فلم پروڈیوسرز بلکہ فنکاروں کے بھی حوصلے بڑھادیئے ۔
