بھارتی طیارہ حادثہ: وزیراعظم شہباز شریف، اسحاق ڈار، نواز شریف اور بلاول بھٹو کا اظہارِ افسوس

13 جون 2025
رپورٹ: بشیر باجوہ / VOC اردو
پاکستان، اسلام آباد
—
بھارتی طیارہ حادثہ: وزیراعظم شہباز شریف، اسحاق ڈار، نواز شریف اور بلاول بھٹو کا اظہارِ افسوس

وزیراعظم پاکستان شہباز شریف نے بھارت کے شہر احمد آباد میں پیش آنے والے افسوسناک طیارہ حادثے پر گہرے رنج و غم کا اظہار کیا ہے۔ انہوں نے سماجی رابطے کی ویب سائٹ ایکس (سابقہ ٹوئٹر) پر اپنے پیغام میں کہا کہ:

> “احمد آباد کے قریب بھارتی ایئر لائن کے طیارے کے حادثے کی خبر سن کر دل افسردہ ہے۔ حادثے میں جاں بحق اور زخمی ہونے والوں کے لواحقین سے دلی ہمدردی اور تعزیت کا اظہار کرتا ہوں۔ ہماری دعائیں اور نیک تمنائیں ان کے ساتھ ہیں۔”

اسی سانحے پر اظہارِ افسوس کرتے ہوئے پاکستان کے نائب وزیراعظم اور وزیر خارجہ اسحاق ڈار نے ایکس پر بیان دیا کہ:

> “احمد آباد میں ایئر انڈیا کی فلائٹ AI-171 کے المناک حادثے پر دلی افسوس ہے۔ قیمتی جانوں کے ضیاع پر غم زدہ ہیں اور متاثرہ خاندانوں سے ہمدردی کا اظہار کرتے ہیں۔”

سابق وزیراعظم نواز شریف نے بھی اس افسوسناک سانحے پر اظہارِ ہمدردی کرتے ہوئے لکھا:

> “یہ حادثہ سرحدوں سے بالاتر ایک انسانی المیہ ہے۔ یہ سانحہ ہمیں مشترکہ انسانیت کی یاد دلاتا ہے۔ وزیر اعظم نریندر مودی اور بھارتی عوام سے دلی ہمدردی کا اظہار کرتا ہوں۔”

دریں اثناء، سابق وزیر خارجہ بلاول بھٹو زرداری اور وزیر دفاع خواجہ آصف نے بھی سوشل میڈیا پر جاری اپنے پیغامات میں حادثے پر افسوس کا اظہار کرتے ہوئے متاثرہ خاندانوں سے تعزیت کی۔

حادثے کی تفصیلات

واضح رہے کہ بھارت کی ریاست گجرات میں واقع احمد آباد ایئرپورٹ کے قریب، برطانیہ کے شہر لندن جانے والی ایئر انڈیا کی پرواز AI-171 دورانِ پرواز فنی خرابی کے باعث ڈاکٹرز کے ہاسٹل پر گر کر تباہ ہو گئی۔

بھارتی میڈیا کے مطابق، طیارے میں عملے سمیت 242 افراد سوار تھے۔ تاحال 200 سے زائد افراد کی ہلاکت کی تصدیق ہو چکی ہے، جبکہ ہلاکتوں میں مزید اضافے کا خدشہ ہے کیونکہ جہاز شہری آبادی پر گرا۔

یہ سانحہ بھارتی ایوی ایشن ہسٹری کے بدترین حادثات میں شمار ہو رہا ہے اور ریسکیو ادارے ابھی بھی جائے وقوعہ پر امدادی سرگرمیوں میں مصروف ہیں۔
—
وی او سی اردو
🌐 www.newsvoc.com
📲 ہمارا واٹس ایپ چینل جوائن کریں: https://whatsapp.com/channel/0029VaCmBaI84OmAfXL45G1k

وی او سی اردو: تحقیقی، تجزیاتی اور غیر جانبدار صحافت کا معتبر پلیٹ فارم

ڈسکلیمر:
یہ خبر ابتدائی ذرائع اور وی او سی اردو کی تحقیق کی بنیاد پر عوامی آگاہی کے لیے شائع کی گئی ہے۔ وی او سی اردو کسی بھی قانونی دعوے یا الزام کی تصدیق یا تردید کی ذمہ داری قبول نہیں کرتا۔