بالی ووڈ اداکارہ انوشکا شرما نے سڑک پر کچرا پھینکنے والے شہری کو کھری کھری سنا دیں ، ان کے شوہر بھارتی کرکٹ ٹیم کے کپتان ویرات کوہلی نے ویڈیو سوشل میڈیا پر پوسٹ کی تو شہری نے انوشکا اور کوہلی دونوں کو آڑے ہاتھوں لے لیا ، کہا کچرا انوشکا کے لہجے سے زیادہ گندا نہیں تھا ۔
ویرات کوہلی نے گزشتہ دنوں اپنے انسٹاگرام اکاؤنٹ پر ایک وڈیو پوسٹ کی جس میں ان کی اہلیہ انوشکا شرما سڑک پر کچرا پھینکنے والے ایک شہری کو کھری کھری سنا رہی تھیں۔
کوہلی کی جانب سے وڈیو پوسٹ ہونے کے بعد شہری نے بھی اسکا بھرپور جواب دیا۔
اپنے اکاؤنٹ پر کوہلی اور انوشکا کو ٹیگ کرکے لکھا کہ پلاسٹک کا ایک چھوٹا سا ٹکرا پھینکنے پر انوشکا نے تماشا لگا دیا، وہ اگر بہتر لہجے میں بھی یہ بات کہہ دیتیں تو ان کی اسٹار ویلیو کم نہ ہوجاتی۔
ارہن سنگھ نامی شخص نے مزید لکھا کہ ان کی گاڑی سے پھینکا گیا کچرا انوشکا کے لہجے سے زیادہ گندا نہیں تھا، شہری نے وڈیو پوسٹ کرنے پر ویرات کوہلی کو بھی شدید تنقید کا نشانہ بنایا۔
