لاہور: حمزہ علی عباسی کی فلم ’پرواز ہے جنون‘ کی ریلیز روک دی گئی۔
لالی ووڈ فلم ’پرواز ہے جنون‘ کی عید الفطر پر ریلیز روک دی گئی جس کی نئی تاریخ کا اعلان عیدالفطر کے بعد کیا جائے گا۔ فلم ائیر فورس کے پائلٹ کی کہانی پر مبنی ہے جس میں پاک فضائیہ کو خراج تحسین پیش کیا گیا ہے جب کہ فلم میں حمزہ علی عباسی، ہانیہ عامر، کبریٰ خان اور احد رضا میر مرکزی کردار میں دکھائی دیں گے۔
اس سے قبل فلم کو عید پر ریلیزکرنے کا اعلان کیا گیا تھا جو اب واپس لے لیا گیا ہے۔ ذرائع کے مطابق فلم کی تاریخ میں تبدیلی کا فیصلہ فلم کے بزنس کو مدنظر رکھ کر کیا گیا چونکہ عیدالفطر کے موقع پر پہلے ہی 3 سے 4 فلمیں ریلیز ہورہی ہیں ایسے میں فلم کا بزنس متاثر ہونے کا خدشہ ہے۔
دوسری جانب فلم کی پروڈیوسر مومنہ درید نے اس بات کی تصدیق کرتے ہوئے کہا کہ عید پر متعدد فلمیں ریلیز ہورہی ہیں اور ہماری انڈسٹری اتنی مضبوط نہیں کہ ایک ساتھ بہت زیادہ فلمز کی ریلیز کو سپورٹ کرسکے۔
