لاہور(نیوز وی او سی آن لائن)پاکستان مسلم لیگ (ن) کا اہم اجلاس پارٹی قائد نواز شریف کی صدارت میں آج (اتوار کو )لاہور میں منعقد ہوگا،دوسری طرف مسلم لیگ ن نےرمضان المبارک سے قبل بھرپور سیاسی سر گرمیاں شروع اور بڑے جلسے کرنے کا فیصلہ کر لیا ہے۔
نجی ٹی وی چینل نے ذرائع کے حوالے سے کہا ہے کہ مسلم لیگ (ن) کا اہم اجلاس پارٹی قائد نواز شریف کی صدارت میں آج (اتوار کو )لاہور میں منعقد ہوگا،اجلاس میں وزیر اعظم شاہد خاقان عباسی کی آمد بھی متوقع ہے جبکہ اجلاس میں دیگر مرکزی رہنما بھی شریک ہوں گے۔ اجلاس میں ملک کی مجموعی سیاسی صورتحال ، پارٹی امور ،عام انتخابات اور آئندہ کے حوالے سے لائحہ عمل پر غور کیا جائے گا ۔ذرائع کے مطابق اجلاس میں نیب عدالت سے غیر معمولی فیصلہ آنے کی صورت میں حکمت عملی بھی مرتب کی جائے گی ۔دوسری طرف مسلم لیگ (ن) نے رمضان المبارک سے قبل بھرپور سیاسی سر گرمیاں کرنے کا فیصلہ کر لیا ،مختلف مقامات پر جلسے کئے جائیں گے جس سے نواز شریف اور مریم نواز خطاب کریں گے۔
