جعلی پولیس مقابلوں کیلئے مشہور عابد باکسر دبئی سے گرفتار
مبینہ پولیس مقابلوں کے لئے مشہور اشتہاری ملزم سابق انسپکٹر عابد باکسر کو دبئی میں گرفتار کرلیا گیا ہے ۔
سابق پولیس انسپکٹر کی گرفتاری انٹرپول کے ذریعے عمل میں آئی ہے ،جسے اگلے چند دنوں میںپاکستان لایا جائےگا۔
لاہور کا بدنام زمانہ گینگسٹرسابق پولیس انسپکٹر عابد باکسر،90 کی دہائی میں خوف کی علامت تھا،2007ءمیں نوکری سے فارغ ہوا اور دبئی فرار ہو گیا۔
عابد باکسر اداکارہ نرگس پر تشدد کرنے کے کیس میں مشہور ہوا ،جس میں اس نے اداکارہ کے سر کے بال مونڈدیے تھے، بچہ گارڈن ، سنیما ہتھانے کا کیس اپنی جگہ ہے لیکن سابق پولیس انسپکٹر جعلی مقابلوں کا ماہر مانا جاتا تھا۔
ذرائع کے مطابق 11 سال سے اشتہاری عابد باکسر کو گزشتہ سال سمن آباد لاہورکے ایک کیبل آپریٹر کےقتل کے الزام میں انٹر پول کے ذریعےگرفتار کیا گیا۔
ملزم کے 2 ساتھی افضال پنو اور شہباز سائیں بیرون ملک فرار ہوگئے، عابدباکسر کے سر کی قیمت 3 لاکھ روپے مقرر تھی۔
ذرائع کا کہنا ہے کہ اسے قانونی تقاضے پورے کرنے کے بعد جلد پاکستان لایا جائے گا۔
دوسری طرف پولیس حکام عابد باکسر کی گرفتاری سے متعلق بات کرنے سے گریز کر تے رہے۔
