اسلام آباد: امریکی سفیر نے بتایا ہے کہ امریکا نے بھارت پر افغانستان میں اقتصادی سطح پر ڈو مور کا مطالبہ کیا جبکہ بھارت پر پاکستان سے تعلقات میں بہتری لانے کے لیے دباؤ ڈالا ہے۔
اسلام آباد میں پاکستان اور امریکا کے درمیان ٹریک ٹو مذاکرات کے چوتھے دور میں اپنے خیالات کا اظہارکرتے ہوئے پاکستان میں امریکی سفیر ڈیوڈ ہیل کا کہنا ہے کہ پاکستانی قیادت نے افغانستان میں قیام امن کے لیے کوششیں تیز کرنے کا یقین دلایا ہے ہم چاہتے ہیں کہ پاکستان دہشتگردوں کے خلاف فیصلہ کن کارروائی کرے، امریکا نے بھارت پر افغانستان میں اقتصادی سطح پر ڈو مور کامطالبہ کیا جبکہ بھارت پر پاک بھارت تعلقات میں بہتری لانے کے لیے بھی دباؤ ڈالاہے۔
امریکی سفیر کا کہنا تھا کہ ہمیں طالبان پر اس وقت تک دباؤ جاری رکھنا ہے جب تک وہ مذاکرات کی میز پر نہیں آتے، خواتین کا احترام اور اقلیتوں کو تحفظ فراہم نہیں کرتے اس وقت تک دباؤ جاری رکھا جائے گا اور تمام گروہوں کے ساتھ ایک ہی طریقے سے نمٹاجائےگا۔
ڈیوڈ ہیل نے خطے میں امریکی پالیسیز کی وضاحت کرتے ہوئے کہا کہ امریکہ کی نئی حکمت عملی علاقائی بنیادوں پر ہے جس کا مقصد دہشت گردوں کی محفوظ پناہ گاہوں کا خاتمہ اور اقتصادی خوشحالی میں اضافہ کرنا ہے۔
