جنین (آن لائن)فلسطین کے مقبوضہ مغربی کنارے کے شمالی شہر جنین میں اسرائیلی فوج نے چھاپوں کے دوران کم سے کم 11 طلبا کو حراست میں لے لیا ہے۔
غرب اردن کے شمالی شہر جنین کے محکمہ تعلیم کی طرف سے جاری کردہ بیان میں بتایا گیا ہے کہ اسرائیلی فوج نے شہر کے سکولوں میں چھاپوں کے دوران بڑی تعداد میں طلبا وطالبات، اساتذہ اور انتظامیہ کو ہراساں کیا اور انہیں تشدد کا نشانہ بنانے کے بعد ان میں سے11 طلبا کو گرفتار کرلیا۔فلسطینی ڈائریکٹر تعلیم طارق علاونہ نے بتایا کہ صہیونی فوج نے حالیہ 2 ایام کے دوران جنین اور شہر کے قصبے یعد اور اس کے 2 مہاجر کیمپوں میں قائم سکولوں پر چھاپے مارے، ان چھاپہ مارکارروائیوں کے دوران قابض فوج نے ایک درجن کے قریب فلسطینیوں کو حراست میں لے لیا۔دوسری جانب فلسطینی حکام نے صہیونی فوج کے ہاتھوں نہتے طلبا کی گرفتاریوں کی شدید الفاظ میں مذمت کی ہے۔
