واشینگٹن 23اکتوبر2017
(بیورو چیف پاکستان بشیر باجوہ، نیوز وائس آف کینیڈآ)
ویسے تو 71 سالہ ڈونلڈ ٹرمپ کی زیادہ تر ٹیم نوجوانوں پر مشتمل ہے۔ان کی نوجوان ٹیم میں ان کے 36 سالہ داماد جیرڈ کشنر جو صدر کے سینیئر ایڈوائزر ہیں سمیت وائٹ ہاؤس کی بغیر تنخواہ کی ملازم 35 سالہ ایوانکا ٹرمپ بھی شامل ہیں جو ڈونلڈ ٹرمپ کی بڑی صاحبزادی ہیں۔ عمررسیدہ امریکی صدر کی نوجوان ٹیم کے دیگر ارکان میں وائٹ ہاؤس کی پریس سیکریٹری 36 سالہ سارہ ہیکبی سینڈرس بھی شامل ہیں، اور اب ان کی ینگ ٹیم میں مزید ایک لڑکی شامل ہوگئی، جو دیگر تمام جوانوں سے بھی زیادہ جوان ہیں۔ ڈونلڈ ٹرمپ نے اپنی ٹیم میں 29 سالہ ہوپ ہکس کو بھی شامل کرلیا ہے، جو وائٹ ہاؤس کے ڈائریکٹر کمیونی کیشن کی ذمہ داریاں نبھائیں گی۔ یہ وہ عہدہ ہے جس سے ڈونلڈ ٹرمپ گزشتہ 6 ماہ کے دوران 46 سالہ سین اسپائسر اور اتنی ہی عمر کے اینتھونی اسکارا کو عہدوں سے الگ کرچکے ہیں۔ یہ پہلا موقع ہوگا کہ نوجوان ہوپ ہکس کسی سیاسی، حکومتی وریاستی عہدے پر خدمات سرانجام دیں گی، اس سے قبل وہ 2016 میں ڈونلڈ ٹرمپ کی صدارتی مہم چلانے والی ٹیم کا حصہ تھیں۔ ہوپ ہکس ڈونلڈ ٹرمپ کی صدارتی مہم چلانے والی ٹیم کا حصہ بننے سے قبل ٹرمپ آرگنائیزیشن کی ملازمہ تھیں، انہیں 2014 میں ایوانکا ٹرمپ نے اپنی فیشن کمپنی میں ملازم کے طور پر بھرتی کیا تھا۔ معروف امریکی میگزین فوربز نے رواں برس بااثر انڈر 30 کی فہرست میں ہوپ ہکس کا نام بھی شامل کیا تھا۔ نوجوان ترین لڑکی کو وائٹ ہاؤس کا کمیونی کیشن ڈائریکٹر تعینات کیے جانے کے بعد ہوپ ہکس کے امریکی میڈیا اور سوشل میڈیا پر چرچے ہیں۔
