لاہور 5 اکتوبر
(بشیر باجوہ بیورو چیف پاکستان نیوز وائس آف کینیڈا)
خوبرو اداکارہ ماہرہ خان ہمیشہ ہی مداحوں کو اپنے مختلف کرداروں سے خوب متاثر کرتی ہیں اور یہی وجہ ہے کہ ان کی نئی آنے والی فلم ’’ورنہ‘‘ کا ٹیزر جاری ہوتے ہی ان کا نیا انداز مداحوں کی دلچسپی سمیٹ رہا ہے۔ 
ماہرہ خان نے اپنے فلمی سفر کا آغاز فلم ساز شعیب منصور کی فلم ”بول” سے کیا تھا جس میں انہوں نے اپنی بہترین اداکاری سے مداحوں کا دل جیتا اور وہ ایک بار پھر شعیب منصور کی فلم ورنہ میں جلوہ گر ہو رہی ہیں۔ ماہرہ نے فلم کا ٹیزر ٹوئٹر پر مداحوں سے شیئر کیا جس میں اداکارہ انتہائی غصے کی حالت اور بدلا لینے کے انداز میں مارتے ہوئے دکھائی دے رہی ہیں۔ ٹیزر کے جاری ہوتے ہی مداحوں کی جانب سے ان کے ایکشن کوخوب سراہا جا رہا ہے اور چند ہی گھنٹوں میں متعدد لوگوں نے ٹیزر کو دیکھ لیا ہے۔فلم کی کہانی ایسی لڑکی کے گرد گھومتی ہے جو اپنے ساتھ ہونے والی زیادتی کا بدلا لینے کی آگ دل میں لیے گھوم رہی ہے۔فلم میں ماہرہ کے ساتھ مرکزی کرداروں میں ہارون رشید، ضرار احمد، نیمل خاور اور رشید ناز شامل ہیں۔ ٹیزر میں چلنے والے میوزک کو بہترین میوزک قرار دیا جارہا ہے اور تمام مداحوں نے ابھی سے فلم کے ریلیز ہونے کا انتظار شروع کردیا ہے۔
