ڈیوس کپ ٹائی: تھائی لینڈ کو ہرا کر پاکستان کی گروپ ون میں رسائی

اسلام آباد (سپورٹس ڈیسک)ڈیوس کپ ٹائی ایشیا اوشیانا زون گروپ ٹو ٹائی میں پاکستان نے تھائی لینڈ کو دلچسپ مقابلے کے بعد 3-2 سے شکست دے دی، اس فتح کے ساتھ ہی پاکستان نے گروپ ون کیلئے کوالیفائی کر لیا ہے ، آخری روز اعصام الحق کو ریورس سنگل مقابلے میں شکست ہوئی تو دونوں ٹیموں کے درمیان مقابلہ 2-2 سے برابر ہو گیا جس کے بعد آخری اور فیصلہ کن ریورس سنگل مقابلے میں پاکستانی کھلاڑی عقیل خان نے غیر معمولی کھیل پیش کر کے حریف تھائی کھلاڑی کٹی فونگ کو اعصاب شکن مقابلے میں شکست سے دوچار کر کے پاکستان کو فتح دلا دی ۔ گزشتہ روز پاکستان سپورٹس کمپلیکس اسلام آباد میں ڈیو س کپ ٹائی کے آخری روز پہلے ریورس سنگل مقابلے میں تھائی لینڈ کے کھلاڑی ویشایا نے عمدہ کارکردگی کا مظاہرہ کرتے ہوئے پاکستان کے اعصام الحق کو زبردست مقابلے کے بعد 7-5، 7-6، 4-6، 6-7 اور 7-6 سے ہرا کر مقابلہ 2-2 سے برابر کر دیا جس کے بعد آخری اور فیصلہ کن ریورس سنگل مقابلے میں عقیل خان نے تھائی کھلاڑی کٹی فونگ کو سخت مقابلے کے بعد 6-4، 6-3، 3-6، 2-6 اور 6-2 سے زیر کر کے ٹیم کو ٹائی میں 3-2 سے کامیابی دلائی۔یاد رہے کہ پہلے سنگل مقابلوں میں اعصام الحق اور عقیل خان نے کامیابی حاصل کی تھی جبکہ ڈبلز میں پاکستانی جوڑی کو شکست کا سامنا کرنا پڑا جس سے مقابلہ 2-1 ہو گیا اور گزشتہ روز پہلے ریورس سنگل میں اعصام الحق کی شکست سے مقابلہ 2-2 سے برابر ہوگیا ۔فیصلہ کن معرکے میں عقیل خان اپنی سروس پر پہلی ہی گیم ہارے تو ٹائی پاکستان کے ہاتھوں سے نکلتی ہوئی دکھائی دی لیکن پھر عقیل نے حریف کی ایک نہ چلنے دی اور میچ جیت لیا ۔