اسلام آباد (آئی این پی)پاکستان کے عظیم گلوکارنصرت فتح علی خان کی20ویں برسی 17اگست کو منائی جائیگی اس سلسلے میں فلمی حلقوں میں مختلف تقریبات کا اہتمام کیا جائیگا جس میں نصرت فتح علی خان کی فنی خدمات کو خراج عقیدت پیش کیا جائیگا وہ 17اگست 1997 کو انتقال کر گئے تھے ۔ نصرت فتح علی خان13اکتوبر 1948 کو فیصل آباد میں پیدا ہوئے ان کے والد استاد فتح علی خان اور چچا استاد مبارک علی خان اپنے دور کے مشہور قوال تھے ۔نصرت فتح علی خان نے بھی بطور قوال ملک گیر شہرت حاصل کی انہوں نے قوالی کی صنف میں مغربی انداز متعارف کروایا جسے دنیا بھر میں بھرپور پذیرائی حاصل ہوئی ۔نصرت فتح علی خان پاکستان سمیت دنیا بھر میں مقبول تھے ان کی وفات سے گلوکاری کے میدان میں پیدا ہونے والا خلا آج تک پُر نہیں ہوسکا۔
