لاہور(نیوزوی او سی ) اگست میں شادی کر رہی ہوں ، شادی کے بعد فلمی دنیا چھوڑ کر بچے پیدا کرونگی ، ماہانہ خرچ دس لاکھ روپے ہے ، اداکار سعود مجھ سے شادی کے خواہش مند تھے ۔ ان خیالات کا اظہاراداکارہ میرا نے دنیا نیوز کے پروگرام ایک دن دنیا کے ساتھ میں میزبان سہیل وڑائچ کے ساتھ انٹرویو میں کیا ۔ میرا نے کہا کہ اسی سال اگست میں شادی کر رہی ہوں مہندی کی تقریب 5 اگست کو ، شادی 22 اگست اور ولیمہ نومبر میں ہوگا ۔ انہوں نے کہا کہ سابق صدر آصف زرداری سے صدارتی ایوارڈ ملا لیکن میں نے کبھی بھی ایوارڈ کے لیے کوئی سیاسی سفارش نہیں کروائی نہ کسی سیاست دان کے ساتھ کبھی کوئی گہری دوستی رکھی ، البتہ نواز شریف سے ٹیلی فون پر ایک بار بات ہوئی تھی ۔ انہوں نے کہا کہ ذہین ، منظم ، نمازی اور اسلامک لڑکے پسند ہیں ، شاہ خرچ اور خواتین کا خیال کرنے والے مرد زیادہ اچھے لگتے ہیں ۔ فلم انڈسٹری سے بہت سے رشتے آئے ، دو بہت اچھے رشتوں کے لیے بھارتی فلم ڈائریکٹر مہیش بھٹ نے بھی کہا جن میں اشمیت پٹیل اور عمران ہاشمی کے نام تھے جبکہ پاکستان میں شروع میں اداکار سعود نے پروپوز کیا ، وہ مجھ سے شادی کرنے میں دلچسپی رکھتے تھے جبکہ بابر علی بھی سیٹ پر بہت خیال رکھتے تھے ۔ انہوں نے بتایا کہ رومانوی سین معمر رانا ، سعود اور بابر علی بہت اچھا کرتے تھے ۔ لوگ میری انگریزی کا مذاق اڑاتے ہیں مجھے بالکل برا نہیں لگتا ۔ بڑی خواہش ہے کہ پاکستان میں کوئی میرا مکمل انگریزی میں انٹرویو کرے ۔انہوں نے کہا دوسری اداکاراؤں کی طرح عمر نہیں چھپاتی ، ابھی 32 سال کی ہوں ، آٹھویں میں تھی جب ریما سے پہلی بار ملی اور ان کا آٹو گراف لیا ، انہوں نے مزید بتایا میرا ماہانہ خرچ دس لاکھ روپے ہے ۔ انہوں نے کہا ایک لباس پہننے کے بعد کبھی دوسری مرتبہ وہ لباس نہیں پہنتی ۔ تنہائی میں ﷲ تعالیٰ کے سامنے بہت روتی ہوں ، اپنے گناہوں کی معافی مانگتی ہوں اور اچھے شوہر کے لیے بھی دعا مانگتی ہوں ، شادی کے بعد فلمی دنیا چھوڑ کر بچے پیدا کروں گی ۔ انہوں نے کہا اب تک سب سے زیادہ پیسے لندن میں ایک شو سے ایک لاکھ پائونڈ ملے تھے جبکہ چار سال پہلے پاکستان میں ایک فلم کرنے کا معاوضہ ایک کروڑ روپے لیا تھا ۔ واضح رہے کہ اداکارہ کا تفصیلی انٹرویو آج رات سات بجکر تین منٹ پر دنیا نیوز پر نشر کیا جائیگا ۔
