بہاولپور: وزیراعظم نواز شریف احمد پور شرقیہ میں آئل ٹینکر حادثے میں زخمی ہونے والے افراد کی عیادت کے لئے بہاولپور پہنچ گئے ہیں۔
وزیراعظم نواز شریف کا بہاولپور پہنچنے پر وزیراعلیٰ پنجاب شہباز شریف، وزیر مملکت بلیغ الرحمان اور اراکین قومی و صوبائی اسمبلی نے ان کا استقبال کیا۔ وزیراعظم نواز شریف آئل ٹینکر حادثے میں زخمی ہونے والے افراد کی عیادت کریں گے جبکہ حکام کی جانب سے انہیں حادثے اور زخمیوں کو دی جانے والی سہولیات کے حوالے سے بریفنگ بھی دی جائے گی۔ اس کے علاوہ وزیراعظم نواز شریف احمد پور شرقیہ میں جائے حادثہ کا دورہ بھی کریں گے۔
واضح رہے کہ گزشتہ روز احمدپور شرقیہ میں آئل سے بھرے ٹینکر میں آگ لگنے کے باعث 150 کے قریب افراد جاں بحق اور 200 کے قریب زخمی ہوئے تھے۔
