لاہور(نیوز وی او سی ) لیو سٹائل ایوارڈ 2017 فیشن ،فلم اور میوزک انڈسٹری کو لاہور میں یکجان کر گیا۔ فیشن آئیکون ڈولی اور فلمسٹارمیگھا نے اپنی پرفارمنس کے ذریعے تقریب کو چارچاند لگا دیئے ۔ایوارڈ کے ذریعے جہاں فنکاروں کی فنی خدمات کو سراہا گیا وہیں فیشن آئیکون ڈولی نے پہلی بار لاہور میں سب سے بڑا ایوارڈشو کرواکر انڈسٹری میں خود کو منوالیا ۔ تقریب میں ملک کے لیجنڈفنکاروں کی خدمات کو ایوارڈ دیکر سراہا گیا جبکہ فنکاروں نے بھی اپنی پرفارمنس سے میلہ لوٹ لیا۔میلوڈی کوئین شاہدہ منی نے اپنے نئے البم کا گانا شو میں پہلی بار گایا۔ شو میں فلمسٹار ثنا اور زویا نظامی نے اعضا کی شاعری کے رنگ بکھیر کر سب کو حیران کردیا ۔ شو میں ترجمان پنجاب حکومت احمد علی نے مہمان خصوصی کے طور پر شرکت کی اس موقع پر اداکارہ میگھا کو سٹیج کی قتالہ کا ایوارڈ دیا گیا اس حوالے سے میگھا نے کہا یہ میری محنت کا نتیجہ ہے کہ رواں سال اب تک7ایوارڈ حاصل کر چکی ہوں تقریب میں فلمسٹار نور بخاری،مدیحہ شاہ ،وارث بیگ ،جرار رضوی ،گلوکارہ شبنم مجید ،پنکی ،مریم ، گلوکارہ شگفتہ ناز سمیت دیگرکو بھی ایوارڈز سے نوازا گیا جبکہ کلاسیکل گائیک جوجی علی خان نے موسیقی کا جادو جگایا اور ایوارڈ بھی حاصل کیا۔
