برلن: امریکی صدر ٹرمپ نے کہا ہے کہ جرمنی کو نیٹو کی بڑی رقوم دینا ہیں۔ غیر ملکی خبر رساں ادارے کے مطابق امریکی صدر ڈونلڈ ٹرمپ نے جرمن چانسلر میرکل سے ملاقات کے ایک دن بعد ٹوئٹر پر اپنے ایک پیغام میں کہا کہ جرمنی کو نیٹو کی بڑی رقوم دینا ہیں۔ انہوں نے لکھا کہ نیٹو اور امریکا جرمنی کے دفاع کے لیے بھاری اخراجات کر رہے ہیں اور جرمنی اس حوالے سے نیٹو اور امریکا کا بھاری رقم کا مقروض ہے۔ ٹرمپ نے ایک دوسرے ٹوئٹر پیغام میں یہ بھی لکھا کہ جھوٹی خبروں کے ذریعے آپ نے جو کچھ بھی سنا ہو، لیکن میری چانسلر میرکل کے ساتھ ملاقات بہت اعلیٰ رہی۔ کل جمعے کے روز میرکل اور ٹرمپ کے مابین وائٹ ہاؤس میں ملاقات کے بعد مشترکہ پریس کانفرنس میں دونوں رہنماؤں کے مابین اختلافات کافی نمایاں تھے۔
