امریکی حکام نے دعویٰ کیا ہے کہ صدر ڈونلڈ ٹرمپ کی جانب سے یروشلم کو آئندہ ہفتے اسرائیل کا دارالحکومت تسلیم کرنے کا اعلان متوقع ہے۔
امریکی حکام کی جانب سے جاری کردہ بیان کے ردعمل میں فلسطین انتظامیہ کا کہنا ہے کہ اگر امریکا نے ایسا کیا یا امریکی سفارت خانے کو یروشلم منتقل کیا تو وہ امن عمل ختم کردیں گے۔
جبکہ عرب لیگ نے اپنے بیان میں کہا کہ اگر امریکا نے یروشلم کو اسرائیل کا دارالحکومت تسلیم کیا تو اس سے علاقے میں انتہاپسندی اور تشدد بڑھے گا۔
سیاسی مبصرین کا کہنا ہے کہ امریکا کی طرف سے یروشلم کو اسرائیل کا دارالحکومت تسلیم کرنے سے مشرق وسطی کا بحران سنگین صورت حال اختیار کر سکتا ہے۔
دوسری جانب اقوام متحدہ یروشلم پر اسرائیل کی حاکمیت کو تسلیم نہیں کرتا اور اس کے مطابق یہ متنازع علاقوں میں شامل ہے جس پر اسرائیل نے قبضہ کر رکھا ہے۔
