کچھ لوگ ڈونلڈ ٹرمپ کا تختہ الٹنے کی سازش کر رہے ہیں,سابق عہدیدار وائٹ ہاوس
کچھ لوگ ڈونلڈ ٹرمپ کا تختہ الٹنے کی سازش کر رہے ہیں,سابق عہدیدار وائٹ ہاوس
امریکی صدر سیاسی اسٹیبلشمنٹ کے نمائندے نہیں، انکو نکالنے کا فیصلہ کرلیا گیا ہے ، وائٹ ہاؤس کے بعض عناصر انکے ایجنڈے کی تائید نہیں کرتے ٹرمپ اپنے ایجنڈے کو آگے بڑھانا چاہتے ہیں تو انہیں وائٹ ہاؤس میں زیادہ سے زیادہ وفاداروں کو لانا ہو گا، انتھونی اسکارا کاامریکی ٹی وی کو انٹرویو
واشنگٹن (آن لائن) وائٹ ہاؤس کے سابق کمیونی کیشنز ڈائریکٹر انتھونی اسکارا موچی نے دعویٰ کیا ہے کہ واشنگٹن میں کچھ لوگ صدر ڈونلڈ ٹرمپ کا تختہ الٹنے کی سازش کر رہے ہیں۔ امریکی ٹی وی کو خصوصی انٹرویو میں اسکارا موچی کا کہنا تھا کہ واشنگٹن اور وائٹ ہاؤس کے اندر موجود کچھ عناصر ڈونلڈ ٹرمپ کو صدر نہیں دیکھنا چاہتے ۔ صدر ڈونلڈ ٹرمپ واشنگٹن میں موجود سیاسی اسٹیبلشمنٹ کے نمائندے نہیں ہیں، لہٰذا انہوں نے ڈونلڈ ٹرمپ کو نکالنے کا فیصلہ کر لیا ہے ۔ واشنگٹن اور وائٹ ہاؤس کے اندر بھی بعض ایسے عناصر موجود ہیں جو صدر کے مفادات اور ان کے ایجنڈے کی تائید نہیں کرتے ۔ اسکارا موچی نے کہا کہ اگر ڈونلڈ ٹرمپ اپنے ایجنڈے کو آگے بڑھانا چاہتے ہیں تو انہیں وائٹ ہاؤس میں زیادہ سے زیادہ وفاداروں کو لانا ہوگا۔ جب ان سے پوچھا گیا کہ آپ ان سازشیوں کے نام ظاہر کریں، تو انہوں نے کہا کہ وہ پہلے ہی چند افراد کے نام منظر عام پر لا چکے ہیں ۔ خیال رہے کہ اسکارا موچی کی وائٹ ہاؤس میں تعیناتی کے بعد ڈونلڈ ٹرمپ کے پریس سیکرٹری سین اسپائسر اور چیف آف اسٹاف رینس پرائبس کو عہدوں سے ہٹنا پڑا تھا ۔ اسکارا موچی نے پرائبس پر الزام عائد کیا تھا کہ وہ صحافیوں کو معلومات لیک کرتے ہیں ، جس کے بعد ٹرمپ نے انہیں عہدے سے ہٹا دیا تھا۔ یاد رہے کہ اسکارا موچی کو گزشتہ ماہ ڈونلڈ ٹرمپ نے عہدے سے برطرف کر دیا تھا اور وہ صرف 10 دن تک کمیونی کیشنز ڈائریکٹر کے عہدے پر فائر رہ سکے تھے ۔
