کراچی نیوز وی او سی آن لائن)کراچی وسطی کے تیموریہ تھانے کی حدود نارتھ کراچی سیکٹر 15 اے 4 میں سٹریٹ کرائم کی واردات کے دوران پولیس مقابلے میں 2 ملزمان ہلاک ہوگئے۔
ایس ایس پی سینٹرل ڈاکٹر رضوان احمد خان کا واقعے کی تفصیلات کے حوالے سے بتانا تھا کہ ملزمان تیموریہ تھانے کی حدود نارتھ کراچی سیکٹر 15 فور کی گلیوں میں شہریوں سے لوٹ مار کر رہے تھے کہ اطلاع ملنے پر تیموریہ تھانے کی پولیس پارٹی موقع پر پہنچ گئی۔پولیس کے مطابق ملزمان نے پولیس کو دیکھ کر فائرنگ کرتے ہوئے فرار ہونے کی کوشش کی۔ پولیس کے تعاقب اور جوابی فائرنگ سے 2 ملزمان ہلاک ہوگئے۔
پولیس کے مطابق ملزمان کے قبضے سے اسلحہ اور موٹر سائیکل برآمد ہوئی ہے۔ ایس ایچ او آصف منور کے مطابق ملزمان کی فوری طور پر شناخت نہیں ہوسکی۔
خیال رہے ضلع وسطی میں آج ہی آئی جی سندھ اے ڈی خواجہ نے سٹریٹ کرائم کی وارداتوں کے حوالے سے ایک جدید کنٹرول روم کا افتتاح کیا۔پولیس حکام کے مطابق اس کے بعد دو ملزمان کی مقابلے میں ہلاکت پولیس کی پہلی کارروائی ہے۔
