پیپلزپارٹی کبھی نہیں ہاری البتہ ہم آر اوز کے الیکشن میں ضرور ہارے، آصف زرداری
لاہور: سابق صدر آصف زرداری کا کہنا ہے کہ پیپلزپارٹی نے کبھی شکست نہیں کھائی البتہ ہم آراوز کے الیکشن میں ضرور ہارے۔
لاہور میں میڈیا سے بات کرتے ہوئے سابق صدر کا کہنا تھا کہ پیپلزپارٹی نے کبھی شکست نہیں کھائی البتہ ہم آراوز کے الیکشن میں ضرور ہارے، 2013 کے عام انتخابات میں ہمارے ہاتھ بندھے ہوئے تھے لیکن اس بار ہم نے پوری تیاری کر لی ہے اور صاف و شفاف انتخابات کے لئے دیگر سیاسی جماعتوں سے بھی مشاورت کی جائے گی۔
آصف زرداری کا کہنا تھا کہ اس بار میرے ساتھ بلاول بھٹو اور بے نظیر کی بیٹیاں خود میدان میں اتری ہیں، اب مخالفین کو پتہ چلے گا کہ الیکشن کسے کہتے ہیں۔ ایک وقت تھا جب بے نظیر بھٹو لاہور میں آتی تھیں تو پورا شہر بند ہو جاتا تھا اور اب بھی ایسا ہی ہوگا، پورا لاہور بند ہو جایا کرے گا، کارکنوں کا جوش و خروش دیکھ کر لگتا ہے کہ جیالے مقابلے کے لئے تیار ہیں۔
اس سے قبل سابق صدر کا کہنا تھا کہ امن و امان کے قیام کے لئے پاک افغان سرحد کو محفوظ بنانا اور دونوں ممالک کے درمیان بداعتمادی کو ختم کرنا وقت کی اہم ضرورت ہے۔ ان کا کہنا تھا کہ پاک افغان سرحد پر باڑ لگانے میں تاخیر سے مسائل پیدا ہوں گے کیوں کہ بارڈر منیجمنٹ کے ذریعے ہی دہشت گردی اور انتہا پسندی پر قابو پایا جاسکتا ہے اور سرحد کو محفوظ بنانے سے ہی الزام تراشی کا سلسلہ بند ہو گا۔
