پیر سید احمد فاروق شاہ مجددی کی زیر صدارت عید میلاد النبی (صلی اللہ علیہ وسلم) کا مشعل بردار جلوس مقرر راستہ سے ہوتا ہوا مرکزی جامع مسجد فاروق اعظم میں اختتام پذیر ہوا۔

گوجرانوالہ 28 نومبر 2017
(محمد شہباز مجددی سے نیوز وی او سی)
مرکزی ادارہ فیضان ابو البیان کے زیراہتمام عید میلاد النبی (صلی اللہ علیہ وسلم) کا عظیم الشان مشعل بردار جلوس نکالا گیا جلوس کی قیادت آستانہ عالیہ آلو مہار شریف کے سجادہ نشین پیر سید مرتضی امین شاہ‘ ممتازمذہبی و روحانی شخصیت پیر سید احمد فاروق شاہ مجددی‘ صاحبزادہ سید کاشف شاہ مجددی اور یورالوجسٹ سرجن ڈاکٹر عبدالحمید عمر، علی حسن بھٹی اور محمد شہباز مجددی و دیگر کررہے تھے۔ جلوس کے شرکاء موٹر سائیکلوں‘ گاڑیوں اور اونٹوں پر سوار تھے جبکہ عاشقان رسول (صلی اللہ علیہ وسلم) کی ایک بہت بڑی تعداد پیدل جلوس میں شریک تھی۔ درود وسلام کی روح پرور صدائیں بلند ہو رہی تھیں‘ ثناء خوان رسول بارگاہ سرور کونین (صلی اللہ علیہ وسلم) میں عقیدت کے پھول نچھاور کررہے تھے‘ نعرہ تکبیر ‘ نعرہ رسالت اور نعرہ حیدری کے فلک شگاف نعروں سے فضا گونج رہی تھی ختم نبوت زندہ باد اور لبیک یا رسول اللہ (صلی اللہ علیہ وسلم) کے نعرے ہر خاص وعام کی زبان پر جاری تھے۔ جلوس کے راستوں میں جگہ جگہ ٹولیوں میں کھڑے عاشقان رسول جلوس کا بھرپور استقبال اور جلوس کے شرکاء پر گل پاشی کررہے تھے۔ جلوس مرکزی جامع مسجد فاروق اعظم ڈیرہ گجراں سے شروع ہو ا اور سیالکوٹ روڈ‘ گوندلانوالہ اڈا‘جی ٹی روڈ اور مختلف راستوں سے ہوتا ہوا مرکزی جامع مسجد فاروق اعظم میں اختتام پذیر ہوا۔