پاپ سنگر نازیہ حسن کی 17ویں برسی منائی گئی
فیصل آباد 13 اگست 2017
(بشیر باجوہ بیورو چیف پاکستان نیوز وائس آف کینیڈا)
فیصل آباد۔ ملک کی معروف گلوکارہ و پاپ سنگر نازیہ حسن کی 17ویں برسی اتوار کو عقیدت و احترام سے منائی گئی ۔ عالمی شہرت حاصل کرنے والی پاکستان کی پہلی پاپ سنگر نازیہ حسن 3اپریل 1965ء کو پیدا ہوئیں ۔ نازیہ حسن نے 1980ء میں صرف 15سال کی عمر میں پاپ گلوکارہ کی حیثیت سے پی ٹی وی سے اپنی فنی زندگی کا آغاز کیا ۔
انہوں نے اپنے بھائی زوہیب حسن کے ساتھ مل کر بہت سے خوبصورت صدا بہار فلمی گیت گائے جن میں بھارتی اداکار فیروز خان کی فلم قربانی کا گیت ”آپ جیسا کوئی میری زندگی میں آئے ”نازیہ حسن کو شہرت کی بلندیوں پر لے گیا اس کے بعد انہوںنے درجنوں دیگر زبردست مقبول نغمے بھی گائے جس سے نازیہ حسن کو دنیا بھر میں پہچان ملی ۔انہوں نے متعدد کمرشلز میں بھی کام کیا ۔
نازیہ حسن 1999ء میں کینسر کے عارضہ میں مبتلا ہو گئیں ۔ انہیں علاج کیلئے لندن منتقل کیا گیا لیکن وہ جانبر نہ ہو سکیں اور 13اگست 2000ء کو اپنے خالق حقیقی سے جا ملیں ۔ نازیہ حسن مرحومہ کی برسی کے موقع پر الیکٹرانک میڈیانے بھی خصوصی پروگرامات نشر کیے نیز مرحومہ کے پرستار وں نے ان کے ایصال ثواب کیلئے قرآن خوانی کا بھی اہتمام کیا ۔
