وزیر تعلیم پنجاب رانا مشہود کے خلاف کرپشن کے ثبوت مل گئے

اسلام آباد( نیوز وی او سی آن لائن) نیب نے پنجاب کے وزیر تعلیم رانا مشہود کے خلاف کرپشن کے ناقابل تردید دستاویزاتی ثبوت ملنے کے بعد جلد گرفتار کرنے کا عندیہ دے دیا ہے اور آخری موقع دیتے ہوئے وزیر تعلیم پنجاب کو از خود تحقیقاتی افسران کے سامنے پیش ہونے کی ہدایت بھی کر دی ہے۔ نیب کے اعلیٰ حکام نے بتایا ہے کہ وزیر تعلیم پنجاب رانا مشہود کے خلاف شروع کی گئی انکوائری مکمل ہو گئی ہے اور اب انکوائری مکمل ہونے کے بعد انوسٹی گیشن بدل چکی ہے جس کے بعد کا مرحلہ میں قومی مجرم کو گرفتار کر کے جیل کی سلاخوں کے پیچھے دھکیلنا ہوتا ہے اور قوم کی لوٹی ہوئی دولت واپس لانا ہوتی ہے، وزیر تعلیم رانا مشہود پر الزام تھا کہ انہوں نے سرکاری اختیارات کا ناجائز فائدہ اٹھانے کے بعد اربوں روپے کے اثاثے بنائے ہیں۔ رانا مشہود ایک ویڈیو میں بھاری رشوت لیتے ہوئے بھی رنگے ہاتھوں پکڑے گئے تھے۔رانا مشہود لاہور سے پنجاب اسمبلی کے ممبر منتخب ہوئے تھے اور وزیر اعلیٰ پنجاب شہباز شریف کے دست راست بھی ہیں۔ رانا مشہود پر الزام ہے کہ گزشتہ 5 سالہ دور حکومت میں انہوں نے بطور وزیر کھیل بھاری مال بنا رکھا ہے تاہم وزیر اعلیٰ پنجاب شہباز شریف نے صوبے کی اہم وزارت تعلیم سے نواز رکھا ہے۔ نیب حکام نے بتایا ہے کہ رانا مشہود کی گرفتاری انوسٹی گیشن مکمل ہونے کے فوراً بعد یقینی بنائیں گے۔