لاہور (نیوز وی او سی آن لائن) زبان پھسل جائے اور منہ سے غلط جملہ نکل جائے تو سبکی ہوتی ہی ہے مگر جب اپنے ہی لیڈر اور سسر کے بارے میں کوئی ایسی بات کہہ دی جائے تو پھر سبکی چھپانا بھی مشکل ہو جاتا ہے۔
ایسا ہی کچھ نواز شریف کے داماد کیپٹن (ر) صفدر کیساتھ بھی ہوا جن کی زبان پھس گئی اور کہہ دیا کہ عوام نواز شریف کے ہاتھ کاٹیں گے، عابد شیر علی صحافیوں سے کہتے رہے کہ رسی والی بات چلانا، ہاتھ والی نہ چلانا۔
کیپٹن (ر) صفدر نے گفتگو کرتے ہوئے کہا کہ ”اس دفعہ عوام نے کہا ہے کہ میاں صاحب تسی نکلو تے اسی آپ چاقو نال تہاڈے ہتھ کٹ دیاں گے۔(اس دفعہ عوام نے کہا ہے کہ میاں صاحب آپ نکلیں، ہم خود چاقو کے ساتھ آپ کے ہاتھ کاٹ دیں گے) “
کیپٹن (ر) صفدر کو جیسے ہی اپنی غلطی کا احساس ہوا تو انہوں نے اپنی شرمندگی چھپاتے ہوئے فوراً جملہ بدلنے کی کوشش کی اور کہا ”آپ کے ہاتھوں پر رسیاں باندھی ہوئی ہیں تو اس مرتبہ عوام آپ کے ساتھ ہیں ہاتھ کھولنے کیلئے، آپ فکر نہ کریں۔“ انہوں نے جب تک اپنا جملہ درست کیا تب تک عابد شیر علی بھی کچھ حد تک ہنسی پر قابو پا چکے تھے۔
انہوں نے کچھ توقف کے بعد صحافیوں کو مخاطب کرتے ہوئے کہا کہ ” یہ رسی والا جملہ چلانا، ہاتھ والا جملہ نہ چلا دینا۔“ جس پر صحافی بھی ہنس دئیے جبکہ کیپٹن (ر) صفدر نے ”ہاں“ کہتے ہوئے عابد شیر علی کی تائید کی۔
