چاقوئوں اور ڈنڈوں کا آزادانہ استعمال ، بعض قیدیوں کے سر تن سے جدا کر دیئے گئے
متعدد قیدی اور پولیس اہلکار زخمی بھی ہوگئے ،جھڑپیں سارا دن جاری رہیں، ذرائع ابلاغ میکسیکو سٹی (آئی این پی) میکسیکو کی لاس کروسس جیل میں قیدیوں کے دو مخالف گروپوں میں ہولناک تصادم میں 28 قیدی ہلاک ہو گئے ۔ غیر ملکی میڈیا رپورٹس کے مطابق جیل میں سخت سیکیورٹی کے باوجود قیدیوں کے دومخالف گروپوں میں صبح سویرے شدید جھڑپیں شروع ہوئیں جو دیکھتے ہی دیکھتے جیل انتظامیہ کے قابو سے باہر ہوگئیں، حکام کے مطابق قیدیوں نے ایک دوسرے کو چاقوئوں اور ڈنڈوں سے مارا اور بعض مخالف قیدیوں کے سر تن سے جدا کردیئے ، یہ جھڑپیں سارا دن جاری رہیں اور قانون نافذ کرنے والے اداروں نے سہ پہر کو صورتِ حال پر قابو پا لیا ، مزید متعدد قیدیوں کے علاوہ درجنوں پولیس اہلکاروں کے زخمی ہونے کی اطلاعات بھی ہیں ، علاقائی گورنر نے واقعہ کی تحقیقات کا حکم دے دیا ہے ۔
