موصل میں کامیابی، سعودی عرب کا امریکا کو خراج تحسین
سعودی ولی عہد کا امریکی وزیر دفاع سے ٹیلیفونک رابطہ، دفاعی تعاون پر بھی گفتگو
دہشتگردی کی فنڈنگ کرنیوالوں کیخلاف جنگ جاری رکھنا نا گزیر ہے ، شہزادہ محمد بن سلمان ریاض(آئی این پی) سعودی عرب نے موصل میں داعش کیخلاف جنگ میں کامیابی اور اس جنگ میں امریکا کے کردار کو خراج تحسین پیش کیا ہے ، عالمی ذرائع ابلاغ کے مطابق سعودی ولی عہد اور وزیر دفاع شہزادہ محمد بن سلمان بن عبدالعزیز نے اتوار کو امریکی وزیر دفاع جیمس میٹس کو ٹیلی فون کر کے انہیں موصل میں دہشت گرد تنظیم داعش کے خلاف کامیابی پر مبارک باد پیش کی ، سعودی ولی عہد نے اس تنظیم کے خلاف لڑنے اور اس پر قابو پانے کے لیے بین الاقوامی اتحاد میں امریکا کے قائدانہ کردار کو سراہا، انہوں نے کہا کہ اسی طرح دہشت گردی کی حمایت اور ان کی مالی اعانت کرنے والوں کے خلاف جنگ کو پورے عزم کے ساتھ جاری رکھنا نا گزیر ہے ، ٹیلیفونک رابطے میں سعودی عرب اور امریکا کے درمیان عسکری اور دفاعی تعاون پر بھی بات چیت ہوئی، علاوہ ازیں دہشت گردی کے خلاف جنگ اور شدت پسندی کے انسداد کیلئے دونوں ملکوں کے درمیان رابطوں کو بہتر بنانے پر بھی تبادلہ خیال کیا گیا۔
