(نیوز وی او سی آن لائن ) صدر ممنون نے نجکاری کمیشن کے چیئرمین کو گورنر مقرر کرنے کی سمری پر دستخط کردیئے ، نوٹیفکیشن جلد جاری ہوگا اسلام آباد (مانیٹرنگ ڈیسک) صدر مملکت ممنون حسین نے نجکاری کمیشن کے چیئرمین محمد زبیر کو سندھ کا گورنر بنائے جانے کی منظوری دیتے ہوئے متعلقہ سمری پر دستخط کردیئے ہیں۔ نوٹیفکیشن جلد جاری کردیا جائے گا۔ محمد زبیر سندھ کے بتیسویں گورنر ہوں گے ۔ حلف برداری کی تقریب جمعرات کو متوقع ہے ۔ ٹی وی چینلز سے گفتگو کرتے ہوئے محمد زبیر نے بتایا کہ کہ گورنر سندھ کے تقرر کے حوالے سے سمری پر دستخط کردیئے گئے ہیں اور کسی بھی وقت نوٹیفکیشن بھی جاری کردیا جائے گا۔ انہوں نے کہا کہ میں اہل سندھ کی ترقی اور خوش حالی کے لیے صوبائی حکومت کے ساتھ مل کر کام کروں گا۔ سندھ کے گورنر کی حیثیت سے خدمات انجام دینا اہم ذمہ داری ہے ۔ میں صوبے میں امن اور استحکام کے لیے جاں فشانی سے کام کروں گا۔ سندھ میں سب سے بڑا چیلنج معاشی نوعیت ہے کیونکہ یہ شہر قومی معیشت میں ریڈھ کی ہڈی کی حیثیت رکھتا ہے ۔ جب تک کراچی اپنا بھرپور معاشی کردار ادا نہیں کرے گا تب تک قومی معیشت مستحکم نہیں ہوگی۔ بطور گورنر سندھ میری اولین ترجیح یہ ہوگی کہ کراچی کی معاشی سرگرمیاں مکمل طور پر بحال ہوں۔ کراچی میں سیکیورٹی کے حوالے سے نمایاں بہتری آئی ہے ۔ اب وہ کراچی نہیں رہا جو 2013 میں ن لیگ کی حکومت قائم ہونے سے پہلے تک تھا۔ ان کا کہنا تھا کہ سندھ بہت حساس صوبہ ہے ۔ اس میں مختلف زبانیں بولنے والے رہتے ہیں۔ سب کا ساتھ لے کر چلنا ہوگا۔ اہل سندھ کی توقعات پر پورا اترنے کی کوشش کروں گا۔ تحریک انصاف کے رہنما فیصل واوڈا نے ایک چینل سے گفتگو میں کہا کہ محمد زبیرپڑھے لکھے اور اچھی شخصیت کے حامل ہیں۔ ایک میڈیا رپورٹ میں بتایا گیا ہے کہ محمد زبیر کو سندھ کا گورنر بنانے کا فیصلہ صدر ممنون حسین اور وزیر اعظم محمد نواز شریف کی ملاقات میں ہوا۔
