قصور کے ڈھائی سو بچے اور بارہ بچیاں پنجاب حکومت کے منہ پر طمانچہ ہیں، خورشید شاہ

اسلام آباد: قومی اسمبلی میں قائد حزب اختلاف خورشید شاہ کا کہنا ہے کہ شہباز شریف کی تالیوں اور مبارک بادوں سے بھرپور پریس کانفرنس شرم ناک ہے۔
خورشید شاہ کا شہباز شریف کی پریس کانفرنس پر رد عمل دیتے ہوئے کہنا تھا کہ وزیراعلیٰ پنجاب کی تالیوں اور مبارک بادوں سے بھرپور پریس کانفرنس شرم ناک ہے جس پر شہباز شریف کو ڈوب مرنا چاہیے کہ وہ ان بچیوں کو بچا نہیں سکے۔
خورشید نے کہا کہ قصور کے ڈھائی سو بچے اور بارہ بچیاں پنجاب حکومت کے منہ پر طمانچہ ہیں، اگر دنیا کی دوسری بڑی فرانزک لیب لاہور میں ہے تو باقی ملزمان گرفتار کیوں نہیں کیے جا سکے؟
قائد حزب اختلاف نے مزید کہا کہ وزیر اعلیٰ پنجاب میاں شہباز شریف ڈھائی سو بچوں اور بارہ بچیوں کے ملزمان کی گرفتاری کی مبارکباد کب وصول کریں گے؟