فلم انڈسٹری کی بحا لی، خدمات پیش کرنے کو تیار ہوں :شبنم
نوجوان نسل کی محبت دیکھ کر دل چاہتا ہے دوبارہ سے فلموں میں کام شروع کروں
معروف فلمسٹار آج کراچی سے لاہورپہنچیں گی،قریبی دوستوں سے ملاقاتیں کرینگی لاہور،کراچی (کلچرل رپورٹر،اے پی پی) معروف فلم سٹار شبنم نے کہا ہے کہ پاکستان فلم انڈسٹری کی بحا لی اور ترقی کے لئے ٹیم ورک کی ضرورت ہے ، وہ اس حوالے سے اپنی خدمات پیش کرنے کے لئے بھی تیار ہیں ،میرے کام سے اگر پاکستان فلم انڈسٹری کو کوئی فائدہ ہوتا ہے تو وہ ضرورکرینگی ، نوجوان نسل کی محبت دیکھ کر دل چاہتا ہے کہ دوبارہ سے فلموں میں کام شروع کروں ۔ ان خیالات کا اظہار انہوں نے بدھ کو کراچی پریس کلب کے پروگرام میٹ دی پریس میں گفتگو کرتے ہوئے کیا۔ اس موقع پر معروف اداکار مصطفی قریشی بھی موجودتھے ۔ شبنم نے مزید کہا کہ آرٹسٹ اور کھلاڑی بہترین سفیر ہوتے ہیں اور ملکو ں کے درمیان تعلقات بڑھانے میں اہم کردار ادا کرسکتے ہیں۔ گفتگوکے دوران اپنے شوہر روبن گھوش کا ذکر کرتے ہوئے شبنم آبدیدہ ہوگئیں۔ اس موقع پر انہیں سندھی اجرک،گلدستہ اور دیگر تحائف پیش کئے گئے ۔ علاوہ ازیں فلمسٹارشبنم آج کراچی سے لاہورپہنچیں گی۔ ذرائع سے معلوم ہواہے کہ اداکارہ ایک روزقیام کے بعد 17فروری کو واپس کراچی روانہ ہونگی ،شبنم لاہورمیں کسی تقریب میں شرکت نہیں کریں گی بلکہ اپنے قریبی دوستوں سے ملنے کے لئے آرہی ہیں،ان کی ڈھاکہ واپسی اگلے ماہ ہوگی۔
