عمران تصوراتی دنیا سے نکلیں، پارلیمنٹ‘ پی ٹی وی‘ جمہوریت پر حملے آپ کے بد ترین کارنامے ہیں: مریم اورنگزیب

اسلام آباد (صباح نیوز) وزیر مملکت برائے اطلاعات ونشریات مریم اورنگزیب نے کہا ہے کہ عمران خان تصوراتی دنیا سے باہر آئیں ، پارلیمنٹ ، پی ٹی وی ، وزیراعظم ہائوس اور جمہوریت پر حملہ آپ کے بدترین کارنامے ہیں ، جھوٹ اور ان حرکتوں کی وجہ سے 2018 میں قوم آپ کا منہ توڑ جواب دے گی ۔ عمران خان کی میڈیا گفتگو پر ردوعمل دیتے ہوئے مریم اورنگزیب نے کہا کہ انسداد دہشت گردی کی عدالت الیکشن کمیشن اور حنیف عباسی کی پٹیشن عمران خان آپ کو ڈھونڈ رہی ہے ، آپ قانون سے استثنیٰ تو لے سکتے ہیں مگر 2018 میں قوم آپ کو استثنیٰ نہیں دے گی ۔انہوں نے کہاکہ خیبرپی کے کی عوام سے دھوکا اور جھوٹ بولنے پر عوام آپ سے 2018 میں حساب لے گی۔ مزید براں اعلیٰ سطح اجلاس کی صدارت کرتے ہوئے مریم اورنگزیب نے کہا ثقافتی کارواں چین اور پاکستان کے عوام کو مذید قریب لانے میں اہم کردار ادا کرے گا ثقافتی کاروان پاکستان چین عوامی روابط کے مضبوطی میں معاون ہو گا دوملکوں میں ثقافتی طائفوں کے تبادلے بہترین تعلقات کا لازمی جزو ہیں دو ملکوںکے مشترکہ ثقافتی کاروان کا تصور منفرد ہے حکومت پاکستان ثقافت کے فروغ کے لیے پرعزم ہے فن و ثقافت کے فروغ سے پاکستان کا مثبت تشخص اجاگر ہو گا۔ اجلاس میں ارمچی سے گوادر تک ثقافتی کارواں روانہ کرنے کے مجوزہ پلان پر غور کیا گیا ۔