صبا قمر اور عرفان خان کی 12مئی کو ریلیز ہونے والی ’’ہندی میڈیم ‘‘ فلم کا ٹیزر پوسٹر جاری

نئی دہلی(نیوز وی او سی آن لائن) حال ہی میں دیپکا پڈوکون کی ہالی وڈ فلم کے پریمیئر میں نظر آنے والے عرفان خان نے پاکستانی ٹی وی سٹار صبا قمر کے ساتھ اپنی آنے والی فلم ’’ہندی میڈیم‘‘کا پوسٹر ریلیز کر دیا ہے، اگرچہ اس پوسٹر میں عرفان اور صبا قمر کہیں نظر نہیں آ رہے لیکن یہ پوسٹر کافی متاثر کن لگ رہا ہے۔
بھارتی میڈیا کے مطابق ایک ہفتہ قبل عرفان خان نے اپنی آنے والی فلم’’ ہندی میڈیم‘‘ کا ایک سین اپنے مداحوں کے ساتھ شیئر کیا تھا جس میں پاکستانی اداکارہ صبا قمر سائیکل رکشے پر بیٹھی ہیں اور انہوں نے شرماتے ہوئے اپنا چہرہ ہاتھ سے چھپایا ہوا ہے۔ساکت چودھری کی ڈائریکشن میں بننے والی یہ فلم 12 مئی کو ریلیز ہوگی، اس ٹیزر پوسٹر نے فلم کے تئیں تجسس کافی بڑھا دیا ہے۔عرفان نے پوسٹر شیئر کرتے ہوئے لکھا، ’’سکول کے دنوں کی یاد آ گئی‘‘ ہندی میڈیم کے پوسٹر میں دو پاؤں دکھائی دے رہے ہیں، جہاں ایک طرف ایک پاؤں میں چمکتا ہوا پالش جوتا اور صاف پینٹ ہے تو وہیں دوسرے پاؤں کا جوتا پھٹا ہوا ہے اور جینز بھی پھٹی ہوئی ہے۔پوسٹر کے ساتھ ایک بااثر ون لائنر بھی ہے. پوسٹر پر لکھا ہے، ‘جھوٹ بولنا، دھوکہ دینا، ماں باپ اپنے بچے کو صحیح سکول میں داخل کرانے کے لئے کچھ بھی کرے گا۔اگرچہ اس فلم میں عرفان کا حلیہ کیا ہے ؟یا یہ فلم آخر کس کے لئے پیغام کو لے کر آ رہی ہے ؟یہ تو واضح نہیں ہو سکا لیکن پوسٹر اور اس کی ٹیگ لائن سے صاف ہے کہ فلم بھارت کے تعلیمی نظام کو ہٹ کر رہی ہے، ساتھ ہی فلم میں جو مسئلہ دکھایا جانا ہے وہ بھی اسی کے ارد گرد گھومے گا۔
عرفان خان ہمیشہ سے ہی کافی گہری اورموثر پیغام دینے والی فلموں کے لئے جانے جاتے ہیں۔ ان کی حال ہی میں ریلیز ہونے والی فلم ’’مداری‘‘ میں سیاسی محکموں کی کرپشن پر کرارا وار کیا گیا تھا لیکن یہ فلم باکس آفس پر کچھ خاص کمال نہیں دکھا پائی تھی۔عرفان خان کی ’’ہندی میڈیم ‘‘ فلم میں پاکستان کی معروف ٹی وی ایکٹر صبا قمر بھی کام کر رہی ہیں، فلم میں دہلی کے چاندنی چوک میں رہنے والے ایک جوڑے کی کہانی دکھائی گئی ہے جو دہلی کی ہائی کلاس سوسائٹی کا حصہ بننا چاہتاہے۔ فلم ’’شادی کے سائیڈ ایفیکٹ‘‘ کے ڈائریکٹر ساکت چودھری کی اس فلم میں نظر آنے والی پاکستانی اداکارہ صبا قمر اس سے پہلے ’’منٹو‘‘ اور ’’لاہور سے آگے‘‘ جیسی فلموں میں بھی کام کر چکی ہیں۔