شمالی کوریا کا بڑا اعلان ،ایٹمی اور میزائل تجربات روکنے اور آج سے میزائل ٹیسٹ سائٹ بند کر دی جائے گی ۔ سربراہ شمالی کوریاکا کہنا ہے کہ ایٹمی یا میزائل تجربات کی اب ضرورت نہیں۔امریکا نے اعلان خیر مقدم کیا ہے، ٹرمپ کاکہنا ہے کہ یہ اہم پیش رفت اور ساری دنیا کےلیے اچھی خبر ہے ۔
جنوبی کوریا کے صدر نے فیصلے کو بامعنی پیش رفت قرار دیتے ہوئے کہا کہ فیصلے سے شمالی ، جنوبی کوریا اور جنوبی کوریا ، امریکا کے درمیان جلد ہونے والے مذاکرات کے لیے مثبت ماحول پیدا ہوگا ۔
جاپان نے اپنے ردعمل میں کہا کہ شمالی کوریا پر دبا ؤکم کرنے کا ابھی وقت نہیں آیا ۔
شمالی کوریا کی سرکاری خبر ایجنسی کے مطابق سربراہ شمالی کوریاکم جونگ نے کہا کہ آج سے ایٹمی ہتھیاروں کی تجربات کے لیے قائم تنصیبات کو بند کیا جارہا ہے اور پیانگ یانگ اب مزید کسی قسم کے ایٹمی یا میزائل تجربات نہیں کرے گا ۔ ان کا مزید کہنا تھا کہ اب شمالی کوریا دنیا بھر میں ایٹمی تجربات ختم کرنے کی عالمی کوششوں کا حصہ بنے گا ۔
کم جونگ کے اعلان کو امریکی صدر نے اہم پیش رفت اور ساری دنیا کےلیے اچھی خبر قرار دیا، ٹرمپ نے کہا کہ انہیں کم جونگ ان سے ملاقات کا انتظار ہے ۔
واضح رہے امریکا کے نامزد وزیر خارجہ مائیک پومپیو نے اس ماہ کے آغاز میں شمالی کوریا کا خفیہ دورہ کیا تھا اور ٹرمپ کے سفیر کی حیثیت سے شمالی کوریا کے سربراہ سے ملاقات کی تھی۔
