سینیگال:فٹبال میچ کے بعد تماشائیوں میں لڑائی،8ہلاک

اموات اسٹیڈیم کی دیوار گرنے سے ہوئیں ، روکنے کیلئے آنسوگیس کا استعمال

آنسو گیس سے اسٹیڈیم میں افراتفری پھیل گئی اور اسی بھگڈر میں دیوار گر گئی ڈاکار (دنیا رپورٹ،نیوز ایجنسیاں)افریقی ملک سینیگال کے دارالحکومت ڈاکار کے ڈیمبا ڈیؤپ اسٹیڈیم میں دیوار گر جانے سے 8 افراد ہلاک اور 49 زخمی ہو گئے ۔برطانوی نشریاتی ادارے کے مطابق یہ واقعہ ڈیمبا ڈیؤپ اسٹیڈیم میں دو فٹ بال ٹیموں کے درمیان کھیلے جانے والے میچ کے دوران پیش آیا۔اسٹیڈیم میں اسٹیڈڈی بور اور یونین ا سپورٹو اواکم کے درمیان لیگ کپ کا فائنل میچ ہو رہا تھا جس میں ایکسٹرا ٹائم میں اسٹیڈ ڈی بور کی ٹیم نے گول کر کے 1 ،2کی برتری حاصل کر لی جو کہ میچ کے اختتام تک برقرار رہی۔آخری سیٹی بجتے ہی دونوں ٹیموں کے شائقین کی آپس میں لڑائی شروع ہو گئی۔ پولیس نے تماشائیوں کو روکنے کے لیے آنسو گیس کا استعمال کیا جس سے سٹیڈیم میں افراتفری پھیل گئی اور اسی بھگڈر میں دیوار گر گئی،جس کے نتیجے میں 8 افراد ہلاک اور 49 زخمی ہو گئے ۔ صدر میکی سال کے ترجمان نے بتایا کہ اس واقعہ کے بعد سنیگال میں جاری انتخابی مہم ایک دن کے لئے معطل رہے گی اور کہا کہ ذمہ داران کو سزا ملنی چاہیے تاکہ ایسا واقعہ دوبارہ نہ ہو۔