کراچی (اسٹاف رپورٹر) حکومت سندھ نے تین وزراء کو اضافی قلمدان سونپ دیے ہیں۔سہیل انور سیال کو ایک مرتبہ پھر صوبائی وزیر داخلہ مقرر کر دیا گیا ہے ۔ چیف سیکریٹری سندھ رضوان میمن کی جانب سے جاری اعلامیہ کے مطابق صوبائی وزیر آب پاشی و معدنیات سہیل انور سیال کو وزیر داخلہ سندھ مقرر کر دیا گیا ہے ، ان کے پاس محکمہ آب پاشی اور معدنیات کے قلمدان بھی ہونگے ۔ صوبائی وزیر ٹرانسپورٹ سید ناصر حسین شاہ کو وزیر اطلاعات مقرر کر دیا گیا ہے ، جبکہ انکے پاس پہلے والا قلمدان بھی رہے گا۔ صوبائی وزیر صحت ڈاکٹر سکندر میندھرو کو مذہبی امور کا قلمدان بھی سونپ دیا گیا ہے ۔ یاد رہے کہ سہیل انور سیال سابق وزیر اعلیٰ سندھ سید قائم علی شاہ کی کابینہ میں صوبائی وزیر داخلہ رہے ، تاہم موجودہ وزیر اعلیٰ مراد علی شاہ نے یہ قلمدان اپنے پاس رکھا تھا۔
