رجنی کانت کی نئی آنے والی فلم رنجت کے لیے ان کے مدِ مقابل ہما قریشی کو سائن کرلیا گیا ہے‘ اس سے قبل ودیا بالن سے اس کردار کے لیے رابطہ کیا گیا تھا۔

17 مئی 2017
(بشیر باجوہ بیورو چیف پاکستان نیوز وائس آف کینیڈا)
بھارتی میڈیا کے مطابق تامل فلموں میں سپراسٹار کا درجہ رکھنے والے رجنی کانت کے مدمقابل ’گینگ آف واسع پور‘ کی ہیروئن ہما قریشی کو کاسٹ کرلیا گیا ہے‘ فلم کی شوٹنگ 28 مئی سے شروع ہوگی۔
فلم کی کہانی ایک گینگسٹر کی زندگی پر مبنی ہے اور تامل سینما کی شان سمجھے جانے والے رجنی کانت اس میں مرکزی کردار ادا کریں گے۔
فلم کی شوٹنگ ممبئی میں ہوگی اوراس کے لیے ایک بہت بڑا سیٹ بھی تعمیر کیا جاچکا ہے‘ گزشتہ اتوار کو رجنی کانت نے فلم کے فوٹو شوٹ میں بھی شرکت کی تھی۔
پہلے کہا جارہا تھا کہ رجنی کانت فلم میں ممبئی کی متنازعہ شخصیت حاجی مستان کا کردار ادا کریں گے تاہم ان کے منہ بولے بیٹے سندر شیکھر کی جانب سے قانونی نوٹس ملنے پر فلم میکرز کی جانب سے وضاحت کی گئی ہے کہ رجنی کانت ’حاجی مستان‘ کا کردار ادا نہیں کررہے۔
فلم میکرز کی جانب سے یہ بھی کہا گیا ہے کہ یہ ممبئی کے پسِ منظر میں لکھی گئی ایک عمومی کہانی ہے اوراس کی حاجی مستان یا کسی سے بھی مماثلت نہیں ہے۔