دو نومبر کو دو نمبر کام نہیں ہونے دیں گے :مولانا فضل الرحمان
پشاور(ایجنسیاں )جمعیت علمائے اسلام (ف)کے سربراہ مولانا فضل الرحمان نے کہا ہے کہ کوئی اسلام آباد کو بند کرنے اور وہاں کے لوگوں کو محصور بنانے کی بات کرے گا تو پھر حکومت کی ذمہ داری ہے کہ وہاں کے شہریوں کو تحفظ فراہم کرے ، دو نومبر کو دو نمبر کام نہیں ہونے دیں گے ، عمران خان دھرنوں اوراحتجاج کے بجائے انتخابات کی تیاری کریں،اس سے صرف قوم کاوقت ضائع ہورہا ہے ۔جے یو آئی سیکرٹریٹ میں دستار بندی تقریب کے بعد میڈیا سے گفتگو کرتے ہوئے مولانا فضل الرحمان کا کہنا تھا کہ مغرب کو ہمارے دینی مدارس پر تحفظات ہیں اور ہمارے حکمران وکیل بن کر ان کی بات کو ٹھیک کہتے ہیں لیکن میں انہیں بتا دیتا ہوں کہ یہ مدارس ہمارے پاس امانت ہیں اور اس کا تحفظ بھی ہماری ذمہ داری ہے ۔ انھوں نے کہا کہ جو لوگ ملک میں دہشتگردی اور فساد پھیلاتے ہیں ،وہ ہم میں سے نہیں ، ہم گالی کا جواب دینے کے بجائے ملک کی ترقی کے لیے باعزت طریقے سے جدوجہد جا ری رکھیں گے ،انہوں نے پرویز رشیدکے استعفیٰ کے حوالے کہا کہ ان سے استعفیٰ لینا حکومت کا اپنا معاملہ ہے وہ اس حوالے سے کچھ نہیں کہہ سکتے ۔مولانا فضل الرحمان نے ایک بیان میں کہا کہ پی ٹی آئی ملک میں افراتفری چاہتی ہے ، علی امین گنڈا پور سے شراب برآمدگی نئی بات نہیں ،انتشار سے بیرونی قوتیں فائدہ اٹھائیں گی ، کوئی بھی جمہوریت کو غیر مستحکم نہیں کر سکتا۔
