دوحہ دہشتگردوں کی مالی اعانت بند کرے-ڈونلڈ ٹرمپ
خطے کے کئی ممالک اپنی سرزمین پر امریکی فوجی اڈوں کے قیام کیلئے تیار ہیں، دہشت گردوں کی ضروریات پوری کرنے والے ممالک کو اپنی پالیسی بدلنا ہو گی
وحشی کو بھوکا رکھ کر اسے ختم کرنا ہو گا ، دہشت گردی وحشت ہے ، اس کی مالی معاونت کا کوئی جواز نہیں، وزیر خارجہ کے ساتھ اختلافات معمولی ہیں، انٹرویو واشنگٹن (آئی این پی) امریکی صدر ڈونلڈ ٹرمپ نے ایک بار پھر قطر پر دہشت گردی کی حمایت کا الزام عائد کر کے اس پر کڑی نکتہ چینی کی ہے ، امریکی ٹیلی ویژن ‘‘سی بی این ’’ کو انٹرویو میں انہوں نے کہا کہ قطر میں امریکی فوجی اڈے کی موجودگی امریکا کی مجبوری نہیں ہے ، خطے کے کئی دوسرے ممالک اپنی سرزمین پر امریکی فوجی اڈوں کے قیام کے لیے تیار ہیں ، صدر ٹرمپ نے کہا کہ قطر دہشت گردوں کے مالی معاون کے طور پر مشہور ہے ۔ اب وقت آگیا ہے کہ دوحہ دہشت گردی کی حمایت اور اس کی مالی اعانت فوری طور پر روک دے ،دہشت گردوں کی ضروریات پوری کرنے اور ان کا پیٹ بھرنے والے ممالک کو اپنی پالیسی بدلنا ہو گی ، اس کے بجائے وحشی کو بھوکا رکھ کر اسے ختم کرنا ہو گا ، دہشت گردی وحشت ہے اور اس کی مالی اعانت کا قطعی کوئی جواز نہیں ہے ، قطر کے معاملے میں امریکی انتظامیہ میں پائے جانے والے اختلافات سے متعلق صدر ٹرمپ نے کہا کہ دوحہ سے متعلق وزیر خارجہ ریکس ٹیلرسن کے ساتھ ان کے اختلافات معمولی نوعیت کے ہیں، پالیسی پر عملدرآمد اور طریقہ کار پر معمولی اختلاف ہے جسے جلد ختم کردیا جائے گا ، انہوں نے کہا کہ قطر کے ساتھ امریکا کے اچھے تعلقات قائم ہیں، تاہم انہوں نے کہا کہ اگرامریکا مجبور ہوا تو دوحہ میں فوجی اڈا ختم کیا جا سکتا ہے ، دسیوں ممالک اپنے ہاں امریکی فوجی اڈے کے قیام کے لیے تیار ہیں۔
