واشنگٹن (اے پی پی) یونیسیف کی جانب سے جاری کردہ رپورٹ میں انکشاف کیا گیا ہے کہ دنیا میں اس وقت 15 کروڑ30 لاکھ بچے یتیم ہیں ، جن میں 6 کروڑ صرف ایشیائی ممالک میں ہیں ۔ یونیسیف کی رپورٹ کے مطابق ان بچوں کی تعداد اتنی زیادہ ہے کہ اگر یہ بچے انسانی ہاتھوں کی زنجیر بنائیں تو پوری دنیا کے گرد حصار بن سکتا ہے ۔ چند مسلم ممالک عراق، افغانستان، فلسطین اورشام میں بھی گزشتہ چند سال سے جاری خانہ جنگی کے باعث یتیم بچوں کی تعداد میں خطرناک حد تک اضافہ ہوا ہے ۔ گزشتہ عشرے میں آنیوالی ناگہانی آفات ، بدامنی کیخلاف جنگ ، صحت عامہ کی سہولیات کی کمی اور روز مرہ حادثات کے باعث جہاں ہزاروں افراد اپنی جان سے ہاتھ دھو بیٹھے ، وہیں لاکھوں بچے بھی اپنے خاندان کے کفیل سے محروم ہو گئے ۔
