ٌلعل شہباز قلندرؒ کے مزار کے احاطے میں دھماکا، 50 سے زائد زائرین شہید متعدد زخمی
سہون شریف: لعل شہباز قلندر کی درگاہ میں دھماکا ہوا ہے جس میں متعدد افراد کے زخمی ہونے کی اطلاعات ہیں جب کہ ہلاکتوں کا بھی خدشہ ظاہر کیا جارہا ہے۔
سہون شریف میں حضرت لعل شہباز قلندر کی درگاہ کے احاطے میں دھماکا ہوا ہے جس کے نتیجے میں ابتدائی طور پر متعدد افراد کے زخمی ہونے کی اطلاعات ہیں۔ نمائندہ ایکسپریس نیوز کے مطابق دھماکا اس وقت ہوا جب مزار کے احاطے میں سیکڑوں لوگ موجود تھے، دھماکا انتہائی زور دار تھا جس کی آواز دور دور تک سنی گئی اور دھماکے کے فوری بعد درگاہ میں مکمل طور پر دھواں پھیل گیا، دھماکے کے بعد مزار میں افراتفری مچ گئی جس سے متعدد افراد پیروں تلے بھی دب گئے جب کہ دھماکے کے نتیجے میں متعدد افراد زخمی ہوئے ہیں۔
دھماکے کے بعد لوگوں نے اپنی مدد آپ کے تحت امدادی کارروائیاں شروع کردی ہیں اور زخمیوں کو فوری طور پر قریبی اسپتال منتقل کرنے کی کوششیں شروع کردی گئی ہیں۔
پولیس کا کہنا ہےکہ جمعرات کا روز ہونے کی وجہ سے مزار میں زائرین کا رش تھا جس کے باعث متعدد افراد زخمی ہوئے ہیں جن میں سے بعض کی حالت نازک ہے تاہم جائے وقوعہ پر ریسکیو کارروائیوں کے لیے ٹیمیں روانہ کردی گئی ہیں۔
درگاہ لعل شہباز میں دھماکے کی اطلاع ملتے ہی سول اسپتال جامشورو اور حیدرآباد کے اسپتالوں میں ایمرجنسی نافذ کردی گئی ہے، ڈاکٹرز اور پیرامیڈیکل اسٹاف کی چھٹیاں منسوخ کرکے انہیں ڈیوٹی پر طلب کرلیا گیا ہے۔
