پیپلزپارٹی کے بانی ذوالفقارعلی بھٹو کی 38 ویں برسی میں شرکت کے لیے پیپلز پارٹی کےشریک چیئرمین آصف علی زرداری اور چیئرمین بلاول بھٹو زرداری نوڈیرو ہاؤس پہنچ گئے، گڑھی خدا بخش میں جلسے کی تیاریاں جاری ہیں۔
کل 4 اپریل کو ذوالفقار علی بھٹو کی برسی منائی جائے گی، برسی میں شرکت کے لیے پیپلز پارٹی کے شریک چیئرمین آصف علی زرداری اور چیئرمین بلاول بھٹو زرداری نوڈیرو ہاؤس پہنچ گئے، جبکہ پیپلزپارٹی کے دیگر رہنماؤں کی گڑھی خدا بخش آمد کاسلسلہ جاری ہے۔
ادھر ذوالفقار علی بھٹو کی برسی کے موقع سیکیورٹی پلان تیار کر لیا گیا، ترجمان سندھ پولیس کے مطابق ذوالفقار علی بھٹو کی برسی کے موقع پر سخت ترین سیکیورٹی انتظامات کئے گئے ہیں۔
برسی پر سندھ پولیس کے6800افسران واہلکار ڈیوٹی دیں گے،صوبے بھر سے 45ایس ایس پیز سیکیورٹی ڈیوٹی کے لیے لاڑکانہ پہنچنا شروع ہوگئے ہیں۔
اسپیشل سیکیورٹی یونٹ کے200کمانڈوز آصف زرداری اور بلاول بھٹو کی سیکیورٹی پر مامور ہوں گے، جبکہ ٹریفک پولیس کے 7ایس ایس پیزاور530اہلکار ڈیوٹیاں دیں گے250خواتین پولیس اہلکار بھی مزار،جلسہ گاہ اور اطراف میں تعینات ہوں گی اور آر آر ایف کے 300اہلکار بھی مزار اور جلسہ گاہ میں تعینات ہوں گے۔
