بلاول بھٹو زرداری کی قائدِ حزب اختلاف سید خورشید احمد شاہ کے خلاف پی ٹی آئی اور ایم کیو ایم کے اتحاد کی مذمت

کراچی 28 ستمبر
(بشیر باجوہ بیوروچیف پاکستان نیوز وائس آف کینیڈا)
وہ لوگ جو ریموٹ کنٹرولڈ کوششوں کے ذریعے حزب اختلاف میں اکثریت حاصل کرنا چاہتے ہیں، حقیقتا جمہوری نظام کے خلاف کام کر رہے ہیں، بلاول بھٹو
پاکستان پیپلز پارٹی کے چیئرمین بلاول بھٹو زرداری نے قائدِ حزب اختلاف سید خورشید احمد شاہ کے خلاف پی ٹی آئی اور ایم کیو ایم کے اتحاد کی شدید مذمت کرتے ہوئے ان کی کوشش کو پارلیمان اور اس کی قوت پر حملہ قرار دیا ہے۔ اپنے جاری کردہ بیان میں پی پی پی چیئرمین نے کہا کہ سید خورشید شاہ نے پارلیمان کو مضبوط بنانے کے لیئے کلیدی کردار ادا کیا اور ہر بحران کے دوران اس کے تقدس کی حفاظت کی، جس سے پارلیامینٹ اورجمہوریت کے اسٹیک ہولڈرز کو خطرہ تھا۔
انہوں نے نشاندہی کرتے ہوئے کہا کہ یہ سید خورشید احمد شاہ کی حکمت عملی اور کاوشیں تھیں، جس کے باعث پی ٹی آئی اور ایم کیو ایم دونوں اس وقت پارلیمان میں بیٹھی ہوئی ہیں اور پارلیمانی نظام کی جڑوں پر کلہاڑا مارنے کے باوجود وہ اس کی مراعات سے مستفیض ہو رہی ہیں۔ بلاول بھٹو زرداری نے کہا کہ وہ لوگ جو ریموٹ کنٹرولڈ کوششوں کے ذریعے حزب اختلاف میں اکثریت حاصل کرنا چاہتے ہیں، حقیقتا جمہوری نظام کے خلاف کام کر رہے ہیں۔
پی پی پی چیئرمین نے کہا کہ پارلیمان کو چیف الیکشن کمشنر، چیئرمین نیب اور نگران حکومت کی مقرری کے متعلق حاصل اختیارات کو کسی فرد یا گروہ کی خواہشات کی بنیاد پر تبدیل نہیں کیا جا سکتا۔ بلاول بھٹو زرداری نے کہا کہ پی ٹی آئی اور ایم کیو ایم کی اچانک پینگیں بڑہانے پر پوری قوم شش و پنج کی حالت میں ہے، کیوں کی ابھی کچھ عرصہ پہلے تک دونوں جماعتیں ایک دوسرے کے خلاف دست و گریباں تھیں۔
پی پی پی چیئرمین نے کہا کہ سید خورشید احمد شاہ نے پارلیمان کی بالاستی کے لیئے محنت کی ہے اور اپنی فہم و فراست سے اس کی خودمختیاری کی حفاظت کی ہے۔ انہوں ے مزید کہا کہ جمہوریت اور حزب اختلاف میں موجود سچے جمہوریت پسند آزمائش کی ہر گھڑی میں سید خورشید احمد شاہ کے ساتھ کھڑے ہیں اور بطور قائد حزب اختلاف ان کی کارکردگی شاندار ہے اور پی پی پی کی جمہوری جدوجہد کے لیئے باعثِ فخر ہے۔