انفارمیشن وار کا نیا منظرنامہ: پاک-بھارت کشیدگی میں فوجی افسران میڈیا کا چہرہ
انفارمیشن وار کا نیا منظرنامہ: پاک-بھارت کشیدگی میں فوجی افسران میڈیا کا چہرہ
پاک-بھارت حالیہ کشیدگی کے دوران، دونوں ممالک کی افواج نے نہ صرف عسکری محاذ پر ردعمل دیا بلکہ میڈیا محاذ پر بھی غیر معمولی سرگرمی دیکھنے میں آئی، جہاں کئی فوجی افسران پریس بریفنگز اور سوشل میڈیا پر نمایاں چہرے بن کر سامنے آئے۔
بھارتی میڈیا کی جانب سے جنگ کو بالی وڈ انداز میں پیش کیے جانے پر بھارت کے سابق آرمی چیف جنرل ریٹائرڈ منوج نروانے نے شدید تنقید کی۔ اُن کا کہنا تھا کہ ’’جنگ کوئی فلم نہیں بلکہ ایک سنگین قومی معاملہ ہے، جس کے بدترین اثرات بچوں اور سرحدی شہریوں پر پڑتے ہیں، لہٰذا امن اور سفارت کاری کو ترجیح دی جانی چاہیے۔‘‘
دوسری جانب سات مئی کو بھارت کی جانب سے کیے گئے مبینہ ’آپریشن سندور‘ کے بعد جاری ہونے والی بریفنگز میں انڈین افواج کی دو خواتین افسران—کرنل صوفیہ قریشی اور ونگ کمانڈر ویومیکا سنگھ—نمایاں رہیں، جبکہ پاکستان کی جانب سے ایئر وائس مارشل اورنگزیب احمد اور لیفٹیننٹ جنرل احمد شریف چوہدری نے بھرپور میڈیا نمائندگی کی۔
ایئر وائس مارشل اورنگزیب احمد
پاکستان ایئرفورس کے سینئر افسر ایئر وائس مارشل اورنگزیب احمد، جنہوں نے 1992 میں جی ڈی (پی) برانچ میں کمیشن حاصل کیا، حالیہ کشیدگی میں فضائی آپریشنز کی ترجمانی کرتے رہے۔ اُن کا کیریئر کئی اہم عہدوں سے مزین ہے، جن میں سعودی عرب میں خدمات، نیشنل ڈیفنس یونیورسٹی میں تدریسی فرائض، اور ڈی جی وارفیئر اینڈ اسٹریٹیجی کی حیثیت شامل ہے۔ انہیں ستارہ امتیاز (ملٹری) بھی عطا کیا جا چکا ہے۔
لیفٹیننٹ جنرل احمد شریف چوہدری
ڈی جی آئی ایس پی آر کے طور پر خدمات انجام دینے والے جنرل احمد شریف چوہدری اس کشیدگی کے دوران پاکستان کے عسکری مؤقف کو واضح کرتے رہے۔ اُن کا تعلق کور آف الیکٹریکل اینڈ مکینیکل انجینئرز سے ہے اور وہ ماضی میں ڈیفنس سائنس اینڈ ٹیکنالوجی کے سربراہ اور ملٹری آپریشنز ڈائریکٹوریٹ میں بھی کام کر چکے ہیں۔
کرنل صوفیہ قریشی
بھارتی فوج کی کرنل صوفیہ قریشی کا تعلق گجرات کی فوجی فیملی سے ہے۔ وہ 2016 میں آسیان پلس مشقوں کی قیادت کرنے والی پہلی انڈین خاتون افسر بنیں۔ وہ اقوام متحدہ کے امن مشن میں بھی خدمات انجام دے چکی ہیں۔
ونگ کمانڈر ویومیکا سنگھ
انڈین ایئر فورس کی ہیلی کاپٹر پائلٹ ویومیکا سنگھ 2500 گھنٹے سے زائد فلائنگ تجربہ رکھتی ہیں اور وہ حالیہ بریفنگز میں ایک پر اعتماد، عسکری خاتون افسر کے طور پر سامنے آئیں۔ ان کا نام بھی اُن کی فضائی وابستگی کی عکاسی کرتا ہے۔
یہ منظرنامہ اس بات کی نشاندہی کرتا ہے کہ جدید دور میں جنگ صرف میدانِ جنگ میں نہیں بلکہ کیمرے کے سامنے اور عوامی تاثر کی لڑائی میں بھی لڑی جاتی ہے، جس میں دونوں ممالک کی افواج نے بھرپور شرکت کی۔
وی او سی اردو: تحقیقی، تجزیاتی اور غیر جانبدار صحافت کا معتبر پلیٹ فارم
مزید خبروں کے لیے وزٹ کریں: www.newsvoc.com
ہمارا واٹس ایپ چینل جوائن کریں: https://whatsapp.com/channel/0029VaCmBaI84OmAfXL45G1k
Disclaimer:
This news is based on initial reports and is intended solely for public awareness. VOC Urdu is not responsible for the verification or denial of any legal claims or allegations.
